Onlayn :50 Bu gün : 243 Bu Ay : 4386 Bu İl : 133719 Cəmi : 688302

Sumqayıt şəhər Mərkəzləşdirilmiş Kitabxana Sistemi

Sumqayıt şəhər Mərkəzləşdirilmiş Kitabxana Sistemi Sumqayıtda kitabxana işinin tarixi doğma şəhərimizin yaranma tarixi ilə üst-üstə düşür. 1949-cu ildə ilk kütləvi kitabxana, 1953-cü ildə uşaq kitabxanası, 1958-ci ildə isə Mərkəzi şəhər kitabxanası açılıb. 1974-cü ildən etibarən Sumqayıtda dövlət kütləvi kitabxanalarını özündə birləşdirən Mərkəzləşdirilmiş Kitabxana Sistemi fəaliyyət göstərir. Hazırda Sumqayıt şəhər MKS özündə S. Vurğun adına Mərkəzi Kitabxana və 10 kitabxananı birləşdirir. Uzun illər Sumqayıt şəhər MKS-ə şəhərimizdə kitabxana işinin təşkili və inkişafı sahəsində misilsiz xidmətləri olan Svetlana xanım Ağayeva rəhbərlik etmişdir. 2008-ci ildən isə bu sistem Yeganə xanım Əhmədovanın rəhbərliyi altında fəaliyyət göstərir. Əhalini fəal mütaliəyə cəlb etmək, siyasi, iqtisadi, hərbi durumumuzu, tariximizi, mədəniyyət və incəsənətimizi geniş oxucu kütlələri arasında təbliğ etmək məqsədilə MKS-də vaxtaşırı olaraq bir-birindən maraqlı tədbirlər keçirilir. Sistem kitabxanaları daha geniş oxucu kütlələrini kitabxanalara cəlb etmək məqsədilə öz işini Sumqayıt Dövlət Universiteti, Sumqayıt Texniki Kolleci, Ağsaqqallar və Veteranlar şurası, Gənclər və İdman Baş İdarəsi, Azərbaycan Yazıçılar Birliyinin Sumqayıt Bölməsi, Sumqayıt Təhsil şöbəsi, Əli Kərim adına Poeziya klubu, Sumqayıt şəhər Mədəniyyət evi, Uşaq və Yeniyetmələrin Yaradıcılıq Mərkəzi, H. Ərəblinski adına Sumqayıt Musiqili Dövlət Dram Teatrı və digər mədəni-maarif müəssisələri, həmçinin Gözdən Əlillər Cəmiyyətinin Sumqayıt şəhər şöbəsi, Qanunun Aliliyi Hüquq Resurs Mərkəzi, Qadın Təşəbbüsü və Sosial Problemlərin Həllinə Yardım İctimai Birliyi və digər Qeyri Hökumət Təşkilatları ilə əlaqəli həyata keçirir. Şəhər əhalisi və oxucular arasında apardığı gözəl təbliğatçılıq fəaliyyətinə görə respublika kitabxanaları arasında Sumqayıt şəhər MKS-in adı həmişə birincilər sırasında çəkilmişdir. Azərbaycan Respublikası Mədəniyyət və Turizm Nazirliyinin təşəbbüsü ilə həyata keçirilən, Azərbaycan Respublikası Prezidentinin 2008-ci il 6 oktyabr tarixli “Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı”nın Tədbirlər Planında nəzərdə tutulan “İlin ən yaxşı kitabxanası” nominasiyası üzrə müsabiqədə Sumqayıt şəhər MKS də iştirak etmiş və “İlin nümunəvi Mərkəzləşdirilmiş Kitabxana Sistemi” nominasiyasında respublika kitabxanaları arasında 2010-cu ilin qalibi olmuşdur. 2013-cü ildə Sumqayıt Mərkəzləşdirilmiş Kitabxana Sistemi öz resurslarını istifadə üçün Milli Kitabxana-İnformasiya Mərkəzinin (AzLİBNET) məlumat bazasına yerləşdirmək hüququ almış, 2015-ci ildən Vahid Mərkəzləşdirilmiş Kitabxana portalına qoşulmuşdur. (sumgait.cls. az) Kitabxananın kollektivi müasir texnoloji vasitələrdən istifadə edərək oxucu sorğularını tez və dolğun ödəməyə çalışır. Kitabxanaların avtomatlaşdırılması sahəsində görülən işlər filiallarda da həyata keçirilir. Belə ki, Sumqayıt şəhər MKS-in filiallarında da kompüterləşdirilmiş infrastruktur qurulmuş, kitabxanaların kompyuterlə, internetlə, WI-FI ilə təmin olunması həyata keçirilir.